Bangkok post, 20-5-2014
ထိုင်းကြည်းတပ်သည် နိုင်ငံတစ်ဝန်းလုံးတွင် ၂၀-၅-၂၀၁၄ရက်နေ့ ၀၃၀၀ နာရီအချိန်မှစ၍ မာရှယ်လောအမိန့် စတင်အသက်ဝင်စေခဲ့ပြီး ယာယီအစိုးရအဖွဲ့ ၏ ငြိမ်ဝပ်ပိပြားမှုတည်ဆောက်ရေးအဖွဲ့အား ဖျက်သိမ်း၍ ငြိမ်းချမ်းမှု ထိန်းသိမ်း ရေး ကွပ်ကဲမှုဌာနချုပ် PKCC အား ဖွဲ့စည်းကာ PKCC ၏ လုပ်ငန်းများ အဆင့်ပြေ ချောမွေ့စွာ ဆောင်ရွက်နိုင်ရေးအတွက် ထိုင်းဘုရင့်တပ်မတော် ကာကွယ်ရေးဦးစီးချုပ်၊ ထိုင်းဘုရင့်ရေတပ်၊ ထိုင်းဘုရင့်လေတပ် ဦးစီးချုပ်များနှင့် ထိုင်းဘုရင့်ရဲတပ်ဖွဲ့အကြီးအကဲတို့ ၄ ဦးအား အကြံပေး ပုဂ္ဂိုလ်များအဖြစ် ဖွဲ့စည်း တာဝန်ပေးအပ်ခဲ့သည်။
ထိုင်းတပ်မတော်တွင် သြဇာအာဏာအရှိဆုံး ထိုင်းဘုရင့်ကြည်းတပ်ဦးစီးချုပ် ဗိုလ်ချုပ်ကြီး ပရာယုဒ်က ၂၀-၅-၂၀၁၄ရက်နေ့ ၁၂၀၀ အချိန်တွင် ထိုင်းဘုရင့် ကြည်းတပ်ခေါင်းဆောင်များနှင့်အတူ လုံခြုံရေးအခြေအနေများ ဆွေးနွေးရန် အစည်းအဝေးတစ်ရပ် ခေါ်ယူခဲ့သည်။ ယင်းအစည်းအဝေးအား အမှတ်(၁)ခြေလျင်တပ်မ(ဘုရင့်ကိုယ်ရံတော်တပ်)တွင် ကျင်းပပြုလုပ်မည် ဖြစ်သည်။
ထိုင်းဘုရင့်ရဲတပ်ဖွဲ့ အကြီးအကဲ ရဲဗိုလ်ချုပ်ကြီး အဒူလ်စိန်စင်ကဲယော့ကလည်း ၎င်း၏ရဲတပ်ဖွဲ့ အဆင့်မြင့်အရာရှိကြီးများနှင့်အတူ အရေးပေါ်အစည်းအဝေးတစ် ရပ်အား ကျင်းပပြုလုပ်ခဲ့ပြီးဖြစ်ကြောင်း၊ ရဲတပ်ဖွဲ့အနေဖြင့် ဗိုလ်ချုပ်ကြီး ပရာယုဒ် ဦးဆောင်သည့် PKCC ၏ ညွှန်ကြားချက်များ ဆက်လက်ရရှိက ရဲတပ်ဖွဲ့၏ တာဝန် ဝတ္တရားများကို ဆက်လက်ဆောင်ရွက်သွားမည်ဖြစ်ကြောင်း၊ မာရှယ်လောအား ထုတ်ပြန်ခဲ့ပြီးဖြစ်သော်လည်း ယာယီအစိုးရအဖွဲ့ကမူ ဆက်လက်တည်ရှိနေဆဲဖြစ်ကြောင်းဖြင့် မေလ ၂၀ ရက်နေ့ အစောပိုင်းတွင် ဘန်ကောက်ပို့စ်သတင်းစာသို့ ပြောကြားခဲ့သည်။
ထိုင်းကြည်းတပ်မှ မာရှယ်လောထုတ်ပြန်အပြီးတွင် ယင်းမာရှယ်လောသည် ယာယီသာဖြစ်ရမည်ဖြစ်ကြောင်း၊ ဒီမိုကရေစီစနစ်အောက်တွင်သာ ထားရှိရမည် ဖြစ်ကြောင်း၊ ထို့အပြင် ထိုင်းနိုင်ငံအတွင်းရှိ နိုင်ငံရေးဆူပူအုံကြွမှုများနှင့် စပ်လျဉ်း၍ စိုးရိမ်ပူပန်မိကြောင်း၊ နိုင်ငံရေးပါတီများအားလုံးအနေဖြင့် လွတ်လပ် စွာပြောဆိုပိုင်ခွင့်အပါအဝင် ဒီမိုကရေစီစနစ် လုပ်ထုံးလုပ်နည်းများအပေါ် လေးစားလိုက်နာသွားကြရန် တိုက်တွန်းလိုကြောင်း မာရှယ်လော ထုတ်ပြန်မှုသည် အာဏာသိမ်းခြင်းမဟုတ်ဟူသော ထိုင်းဘုရင့်ကြည်းတပ်၏ ကြေညာချက်ကို မိမိတို့ သဘောပေါက် နားလည်ပါကြောင်း၊ ဆူပူအုံကြွမှုများ အား ကာကွယ်တားဆီးရန်အတွက် ထုတ်ပြန်ခဲ့သည့် မာရှယ်လောအမိန့်သည် ယာယီသာဖြစ်သည်ဟူသည့် ထိုင်းဘုရင့်ကြည်းတပ်၏ မှတ်ချက်ပြု ပြောကြား ထားမှုအပေါ် ထိုင်းဘုရင့်ကြည်းတပ်မှ အလေးထား လိုက်နာသွားလိမ့်မည်ဟု မိမိတို့ ယုံကြည်မျှော်လင့်ထားပါကြောင်း၊ မတူကွဲပြားမှု များအား ဖြေရှင်းရန် အတွက် ထိုင်းနိုင်ငံရေးပါတီများအားလုံး တွေ့ဆုံဆွေးနွေးခြင်း၊ ရှေ့ဆက်လျှောက် ရမည့် နည်းလမ်းရှာဖွေခြင်းများဖြင့် အတူတကွ လက်တွဲဆောင်ရွက်သွားကြလိမ့် မည်ဟု မိမိတို့ လေးလေးနက်နက် ယုံကြည်ထားပါကြောင်းဖြင့် အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့် ရှိသူ Mrs Jen Psaki က မေလ ၁၉ ရက်နေ့ နှောင်းပိုင်းတွင် ပြောကြားခဲ့သည်။
အစိုးရထောက်ခံသူ ရှပ်နီအဖွဲ့ခေါင်းဆောင်တစ်ဦးဖြစ်သည့် မစ္စတာ ကျတုဖုန် ဖရုန်ဖန်က ထိုင်းဘုရင့်ကြည်းတပ် ဦးစီးချုပ်ဦးဆောင်သည့် ငြိမ်းချမ်းမှုထိန်းသိမ်း ရေးကွပ်ကဲမှုဌာနချုပ် PKCC နှင့်အတူ ပူးပေါင်းဆောင်ရွက် သွားကြရန် ၎င်း၏ ရှပ်နီအဖွဲ့ဝင်များအား တိုက်တွန်းပြောကြားထားသည်။
ဘီလူးကျွန်းသား
No comments:
Post a Comment